බේබදු තාරාවා.......

"තාත්තෙ තාරාව ගැන රචනාවක් ලියාගෙන එන්න කියල ඉංග්‍රීසි මිස් කිව්ව"

"ඉතිං අම්මගෙන් අහගනිං.වෙනදට අහගන්නෙ එයාගෙන්නෙ.අනික මගෙ ඉංග්‍රිසි එච්චර හරිත් නෑ"

තමන්ගෙ ඉංග්‍රීසි දැණුම ගැන ඉඟියක් දෙන  ගමන් කෝලිතය කිව්වා.

"මම උයනවා තමුසෙට පේන්නැද්ද. ඔය හදන්නනෙ ආයෙත් සැරයක් එළියට පනින්නයි. හැමදාම මම ම කියාදෙන්න ඕනි නැහැනෙ. අද තමුසෙ කියල දෙනවා" 

කිචන් එකෙන් නැවතත් අණ ලැබුනා.

"තාත්තෙ ඉංග්‍රීසි කියන්නෙ අපේ බාසාවක් නෙමේලු. ඒක හින්ද වැරදුනාට කමක් නැහැලු. අනිත් කෙනා කියන එක තමන්ට තේරෙනවනං,තමන් කියන එක අනිත් කෙනාට තේරෙනවනං ඒක හොඳටම ඇති කියලයි අපේ ටීචර් කියන්නෙ. අනික ඔය ටීවී එකෙත් සැරෙන් සැරේ ඕක කියන්නෙ" කොල්ල කෝලිතය මොරාල් එක දුන්නා.

"මම කියල දෙන්නං හැබැයි ඉස්කෝලෙ ගිහින් කියන්නෙ උඹ තනියම කරගෙන ආව කියලයි. තේරුනාද?"

කොල්ල හා කියන්න ඔලුව වැනුව.

දැන් කෝලිතයට බයක් නෑ.

බය එකක් නෙමේ, දෙකක්ම නෑ.

එකක්, කෝලිතයගෙ ඉංග්‍රීසි දැණුම ගැන ඉස්කෝලෙට නෝන්ඩි වෙන්නෙ නෑ. අනික කොල්ලට කෝලිතය තරංවත් ඉංග්‍රීසි දන්නෙ නැති හින්ද බයක් නෑ.

ඇත්තටම කිව්වොත් නං ඉංග්‍රීසි නොදන්නෙමත් නෑ. හැබැයි සමහර සුළු සුළු දේවල් දන්නෙම නෑ.

ඔය සමහරු මුගුනුවැන්නයි කංකුනුයි අඳුනන්නෙ නෑවගේ. රාබුයි නෝකෝලුයි අඳුනන්නෙ නෑ වගේ.කැකිරියි පිපිඤ්ඤයි අඳුනන්නෙ නෑ වගේ.

"හැබැයි තාත්තෙ හැමෝම ලියන්නෙ නැති අළුත් දේවල් ලියාගෙන ආවොත් තමයි ලකුණු දෙන්නෙ කිව්වා "

"මොනවද බං තාරාවට තියන අපි නොදන්න අළුත් දේවල්"

මම සිංහලෙන් කියන්නංකො. 
ඔයා මට ඉංග්‍රීසියෙන් කියන්න.
මම ලියාගන්නම්. 
කොල්ල භාෂා පරිවර්තන කටයුත්ත පවරන ගමන් කිව්වා.

කෝලිතයගෙ වෙරි පොඩ්ඩක් බැස්සා. හීන් දාඩිය මහතටම දැම්මා. නිකම්ම හා කියල කියඋනා.

දැං තාත්තෙ තාරාවට කියන්නෙ Duck කියලනෙ. එතකොට තාරාවො දෙන්නෙක් කියල කියන්නෙ කොහොමද?

Duck, Duck කියල. කෝලිතය නොපැකිලිව උත්තර දුන්න.

දැන් කියන්න තාරාවො දෙන්න ලස්සනයි කියන වාක්‍යය ඉංග්‍රීසියෙන්.

Duck, Duck ඊස් බියුටිපුල්

කොල්ල කොහොම ලිව්වද දන්නෙ නෑ හැබැයි ලියා ගත්ත.

තාරාවිට ඉංග්‍රීසියෙන් කියන්නෙ මොකක් කියලද?

බඩ් Duck කියල. 

මෙච්චර ඉක්මනට වචන එන එක ගැන කෝලිතයට ඌ ගැනම ආඩම්බර හිතුන. 

දැන් කියන්න මගෙ අක්ක තාරාවියක් වගේ කියල.

දැන් උඹට ඕනැ අක්ක ගැන කියන්නද, තාරාව ගැන කියන්නද. අනික උඹට කොහොම එක පාරටම අක්කව මතක් උනේ?

දැං මං කිව්වෙ .හැමෝම ලියන්නෙ නැති අළුත් දේවලුයි ලියන්න ඕනැ කියල. අනිත් එක ගමේ කොල්ලො කවුරුත් අක්කට කතා කරන්නෙ තාරාවි කියල.

එහෙනං ලියාගනිං මයි සිස්ටර් ඊස් බඩ් Duck කියල

දැන් කියන්න තාරාවන් බාග නොමැත කියල

මොනවද බං උඹ ඔය කියන්නෙ

ඇයි තාත්තෙ දැං මං කිව්වෙ.ඔයාට බැරිනං කියන්න මං අම්මගෙන් අහගන්නම්

එහෙනං ලියපං දෙයාර් ආ නෝ අ Duck

අපේ ගෙදර තාරාවන් ගොඩාරියක් ඇත

වී  හෑව් හෝම් ගො Duck.

මාමලට ඉන්නේ තාරාවන් ටිකකි.

මයි අන්කල් හෑව් පොඩ් Duck

තාත්තෙ, වැඩ කරන තාරාවන්ට මොකක්ද කියන්නෙ.

කොහෙද බං තාරාවො වැඩ කරන්නෙ. මගෙ රස්සාවත් ෂුවර් නැති කොට

අම්මේ............

ලියපං,ලියපං වැඩ කරන තාරාවන්ට කියන්නෙ වැ Duck කියල.

දැං කියන්න වැඩකරන  තාරාවන්ට කෑම ඇත කියල

ඊටිං පුඩ් ඊස් වැ Duck

වැඩ නොකරන තාරාවන්ට කෑම නැත

නෝ ඊටිං පුඩ්ස් අවැ Duck

හුඟක් තාරාවන් මඩ කයි

ගො Duck , Duck කන ම Duck

තාත්තෙ කන කියන්නෙ සිංහල වචනයක්නෙ

එහෙනං ඒ වෙනුවට දාගනිං ඉයර් කියල.

තාරාවන්ගේ ඇස් කෙවෙන්නේ නැත

මොන රෙද්දක්ද බං උඹ ඔය කියන්නෙ

අම්..........

හරි , හරි ලියපං Duck අයි නොට් ගොයිං රොඩ් Duck

තාරාවන් දේසපාලනය නොකරයි

Duck හෑව් නොට් පොලිටික්වලට ඉ Duck

තාත්තෙ අස්සෙං, අස්සෙං සිංහලත් තියනවනෙ.

දැං උඹම නේද කිව්වෙ තේරෙන එකාට තේරෙනවනං ඒ ඇති  කියල
අසනීප වෙච්ච තාරාවට මොකක්ද කියන්නෙ?
ලෙ Duck
දැන් කියන්න අසනීප තාරාවට බෙහෙත් දෙන්න කියල
ලෙ Duck නං ගිව් ඩ්‍රග්ස් කුDuck

තාරාවෙ‍ගේ හොට උල් නැත
Duck නෝස් නොට් තුDuck
තාරාවන් ක්‍රිකට් වලට කැමතිය 

Duck ලයික් Duckවර්ත් ඇන්ඩ් ලුයිස්

තාරාවන්ට කිසිම වාහනයක් නැත

Duck නොට් හෑව් Duckකුවක්වත්

තාත්තෙ අන්තිම වාක්කය අහන්න කලින් මේක කියන්න බේබදු තාරාවට කියන්නෙ මොකක්ද?

කොල්ල ඔලුව උස්සන විට කෝලිතයා පුටුවේ හිටියේ නැත.